هل اصبح “الكلاش” من أركان الصيام ؟؟؟

هل اصبح “الكلاش” من أركان الصيام ؟؟؟

ثقافة الكلاشات و لمعاطية و عطيني نعطيك و حشي ليا نحشي ليك ولات هي السمة الأساسية في حياتنا سواء الواقعية ولا الافتراضية. وللأسف الكلاش بعض المرات ولا بالجيش الإلكتروني .. كل واحد ولا يتبجح عندي جيش عندي جيش و كأنه صلاح الدين داخل لحرب مقدسة بتحرير اورشاليم ..

الراب اصل الراوية و البيك و مسلم اول فصل.

هدشي تاع لكلاش يمكن بدا قدييييم ناس لي كانت متبعة لموفمومن ديال الراب في 2007 غادي يعقلو على الكلاشات لي ناضت بين قشلة (طنجاوة ) و لمافيا(كزاوة) البيك لي ناض كلاشا مسلم و صحابو و بداو سلاسل الفيديوات و راه مزال الكثير منها في اليوتوب ة هدشي سبب سنين ديال القطيعة تا صالحهم مومو كبير ديال هيت راديو واحد نهار من بعد ما دارو عقلهم. و من ديك الوقت ليومنا هذا مسلسلات لكلاشات في راب ما حبساتش و لعل المغاربة عاقلين على بيك و ديزي دروس دارو الملايين ديال المشاهدات ملي بداو يسبو في بعضياتهم و يعيب كل واحد في مرات لآخر بطريقة مستفزة و للأسف ماشي غير هوما .. هدشي تاع الأعراض ولا طوندونس في الراب و للأسف ولينا نشوفو لكلاشات كتر من الكلام و الابداع.

التشهير و نشر الفضائح

مايمكنش نهضرو على التشهير ولا الفضايح و ما نجبدوش أشهر كونط في المغرب ” حمزة مون بيبي” و لي بسبابو عدد من عباد الله لقاو راسهم في الحبس و آخر دنيا بطمة و لي محكومة بسنة سجن .. الكونط ديال حمزة مون بيبي للأسف فتح هد الباب ديال الفضائح و نشر الغسيل و التشهير و الابتزاز و لي اليوم مستمر بصفحة انستغرامية مسمية راسها بالحكومة ديال الانستغرام.

الحكومة .. خرجات للعلن

من نداول ظهور لصفحة الحكومة و اسمها كان غريب و كلشي كايقول ماشي اسم عادي بل اسم عندو معناه و المعنى راه واضح .. منذ اول يوم للهد الصفحة و هي كتنشر غا الفضايح و البعض كايقول امو المثير من هد لفضايح هي في الأصل متفق عليها مع المعني بالأمر .. يعني انا كنوض نشوه راسي و نعطي أسراري لهد الصفحة و هي تنشر و شوية شوية الاسم ديالي يولي تراند في لبلاد و ديك ساعة أراك للاشهارات و الكولابوغاسيون و الكادوات و مايهمك واش هدشي على حساب سمعة لبلاد لي نهار على نهار اسهمها كطيح.

الفذ و بوتازوت آخر الملتحقين بركب الكلاش

يبدو انو آخر حوار ل”لكبور” جبد عليه النحل من الإكس ديالو “الشيعبية” و لي عطاتو من لمنقي خيارو لدرجة سي حسن الرزين لي كايقول انو لا يجيب جاوبها و تاهو مل خلاش من جهدو و اختم كلامو بوصفها ب”البدوية” و تاهي ما عطلتوش قالت ليه بدوية و افتخر. المشكل انو بجوجهم مسابقين على شكون فيهم غادي يتبدل للآخر انو طالع في طوندونس و فعلا بجوج طلعو للقمة الطوندوسية في اليوتيوب ولكن طاحو في قاع و يمكن تا تحت من القاع في الإبداع.. لا هي لا هو دارو أعمال ضعيفة بشهادة الجميع و للأسف طاحو في النمطية القاتلة و محاولة استخراج الضحكة بزز من المشاهدة و هدشي خلا ناس يفضلو يشاهدو مسلسل الكلاش بيناتهم على متابعة السلسلات الحامضين لي بلاونا بيهم.

الصفحات الانستغرامية المأجورة

يبدو انو هدشي تاع لكلاش ولا فيه شبه مافيات متحكمة فيه مجموعة من الكونطات لي عندهم المتابعين و لي خدامين بنظام “لانفولوب” عطيني نشكر ولا عطيني نكلاشي .. كنلقاوهم مرات كايديرو الشعر و المدح في مسلسل لي اصلا مزال ما داز منو تا جوج حلقات و سمواه افضل إنتاج مغربي في القرن علما أنو لي متلين والله ما شافوه لأنهم عارفينو غا بريكول .. أو العكس نلقاو هد صفحات كتقود حملات ضد منتوج راقي و في المستوى بحال كيف دار مثلا مسيمنة مع باسو و غيرو بزاف و هدشي كايخلينا نتساؤلو واش هدشي غا لله في لله؟؟

رمضان كل سنة ولفنا فيه هدشي غير هو هد العام هد تبرهيش أكثر حدة … ولكن كايبقى رمضان شهر للكلاشات و ماشي غا عندنا في المغرب راه ايضا عند جيران السوء كنلقاو برامج هاكا و عند توانسة و اكيد اكيد عند خوتنا تاع الفول المدمس الأمر ولا بيزنس صحيح الملايين كتدخل من الكلاشات و عطيني نعطيك في كل رمضان … حتى أصبحنا نسأل أنفسنا هب الكلاش من أركان الصيام الصحيح.