الشيخة طراكس في مواجهة الجميع.. الشعب باغي غا شطيح

آش واقع / قفشات بالداريجة

ملي بدا رمضان و كلشي لاحظ انو الشيخة الطراكس دارت واحد المسابقة من خلال صفحتها كدير أسئلة و أجوبة و حاطة ايضا جوائز محفزة .. و شخصيا عجبتني هد المبادرة و حاولت قد المستطاع انو نتبعها .. لانو جميل جدا انو اي واحد مؤثر في مواقع التواصل مرة مرة يتهلى في المتابعين ديالو بكادوات باش يبقاو دائما معاه “ماركوتينگ” .. الشيخة الطراكس دارت يمكن خطأ في إعداد الأسئلة ديالها و خلطات الامور و سمات الشيخ ابن تيمية بي إبن تيميمية … حسب المقطع المتداول هي غالطة و المتابعة ديالها عندها الجواب صحيح .. ولكن فاطمة الطراكس بحال اي مغربي و مغربية بدات في تخراج العنين .. و هدشي كلنا كنديروه و كنتعصبو لرأينا و ممكن. نقلبوها صباط و حنا اصلا غالطين.. واخا بيني و بينكم اصلا هد انو ابن تيمية شيخ الإسلام راه غا القاب مشرقية دخيلة علينا لانو عندنا في المغرب اقطاب إسلامية لا يشق لها غبار ولكن للاسف لم يسوق اسمها و هذا موضوع اخر حد متشعب.


نرجعو لطراكس أشنو دارتو عيب او حرام باش كلشي يهاجمها؟؟ اسيدي نمشو في فرض المثل هد سيدة دارت شهر للتوبة و 11 شهر الشطيح انت لي كتدوي فيها راه خدام 24/24 ساعة حضية و نميمة و تا شهر رمضان راك خدام بيرمانونص تبارك الله .. راه رمضان هذا مافيها باس لا درنا بالمثل القائل” اترك الخلق للخالق” … طراكس اختارت انها تبعد عن شطيح ولو غير شهر و هذا امر زوين .. و فكرات انها دير جوائز للمتابعين ديالها و هذا أمر اجمل .

والا غلطات ماشي غادي نوضو كلنا نجلدوها و نطلعوها عليها .. يعني الا دابا الا ناضت تشطح و تفوز لينا في لايڤ غادي تكونو ناشطين ؟؟ ولا تاني غادي تنوضو و تقولو ما احتارماتش الشهر الفضيل و المفروض انها توب واخا غا هد شهر ..و طراكس راه واجهاتكم بحقيقتكم نتوما باغين غا لبوز و شطيح و كون دارت لايڤ شطيح غادي يوصل للملايين و لايڤ مسابقة دينية فيه جلابة و فولار معمرو وصل ليها تا ألف مشاهدة … و هدشي لي قالت بضبط هو لي نوض عليها الصداع حينتاش قالت الحقيقة لي يعتبرها الكثير مستفزة .. طراكس عراتكم و حطتكم قدام مرآة الحقيقة.


طراكس اختازلت الواقع تاع الويب المغربي … اي موضوع هادف راه تا حد ماغادي يتسوقو .. و اي حاجة فيها الشوهة غادي تلقاها في طوندونس و بملايين المشاهدات و نفي هادو الملايين كايسبو و يقولو مابغيناش نشوفو و هوما لي مطلعينو للعمارية … طراكس قالت ليكم لي كاين فئة كبيرة من الويب مريحة عاصرة على اي واحد يغلط و يبداو في جلده .. هد شي لي غادين فيه مواقع التواصل راه كارثي و خاص ولابد شي غربال كبيييير لهدشي.

التعليقات مغلقة.