لبام لي دارت عليه ليام

آش واقع/محمد ماگري

مكاين شي جريدة في المغرب ما كتباتش على هد الهيلالة لي نايضة في لپام.
هاد المناوشات ماشي جديدة ولكن دابا كلشي تفرش … ولعل التبربيقة لي عطى ولد الجماني لبنشماش هي خير دليل على أنو هيبة الأمين العام مشات و هو ما يعني أنو المنصب تاعو ولا مكتوب غا بي طاباشير.
ماغاديش نرجعو للسياق منين جا و أسباب الحرب الداخلية في الحزب, ولكن ناقشو غا أش وقع في هد الأسابيع الأخيرة.
حزب تراكتور قاليك بغا يدير مؤتمر و خاصو لجنة تحضيرية و هنا تفرگاع الرمانة و بدا تنوزيق و كلها بدا كاينش على كبالتو و لائحتو … و هنا تيار بنشماش و تيار اخشيشن تساطحو … ولكن لا يخفى على أحد أنو لي كلا عصا مزيان هو تيار الأمين العام. حينتاش المفروض أنو عندو الأغلبية و خاصو يكون معاه الجميع, الشيء لي مابانش طوال الإجتماعات الماراطونية لي دارت.
لفيلم كان ممكن يسالي هنا و يتوافقو و يخرجو من باب واسع .. ولكن بنشماش لي ولا معروف انو ديما كايقلبها دراما قرر ينساحب من الإجتماع,الشيء لي ما عجبش صحابو و قرروا يكملوه و يكملو الانتخابات لي عطات سمير كودار كرئيس للجنة التحضيرية و لي جاتو تا رسائل التهنئة من الجميع الا من الامين العام لي قال انو نصب راسو براسو.
و هنا جاء الجزء الثاني تاع هد المسلسل التركي تاع تراكتور … داكشي تاع الشرعية و المشروعية و لجان الانضباط و السلوكيات. و خرجات وثيقة وقع فيها حوالي 50 من لمخاخ لكبار تاع الحزب كتحاول تحط خطة للخروج من الأزمة, و سماوها “صوت خبراء لبام”, هد الوثيقة كانت نداء باش يدار مجلس حكماء يقاد الأمور و يصلح الخلافات و يجمع هد العصيدة تاع الحزب و يقلل من نشر الغسيل لموسخ تاع الحزب على صفحات المواقع.
ولكن هيهات و معامن نتوما ألحوكاما … عبداللطيف وهبي رجل القفشات بإمتياز خرج ليهم من جنب و فرگع الرمانة و جاهم مت اللخر .. و عطى واحد التصريح اغرب من غريب مفاده أنو بنشماش خدام الأجندة تاع لحمامة واها هو رايس تاع تراكتور …و كثر من هدشي السيد قال أنو إلياس العماري هو لي منوض البلبة في لحزب و شاعل لعوافي .. حينتاش هما بجوج (لعماري و بنشماش) مازال ما شبعوش من الحلوة.
حسب مصادرنا انو معارضي رئيس الغرفة الثانية للبرلمان دارو واحد لفطور مضخم (مول لعراضة هو الطنجاوي احمد الادريسي) سماوه “مؤتمر رمضاني” باش يقلو ليه السم … و منها يحطو نهاية لهد المهزلة .. وحسب نفس المصادر الفيلم لبامي غالبا غادي يسالي بدورة إستثنائية يطيرو فيها بنشماش حينتاش على ما يبدو عندهم النصاب القانوني.

ولكن تا بنشماش ماساهلش و حلف تا يگلعهم واحد واحد و بما أن تسياق الدار كايبدا من لفوق السيد غربل اخشيشن هو اللول.

خلاصة هدشي تاع لبام هي المثل المغربي الشهير ” باك راه طاح .. من لخيمة خرج مايل”.